مشینی گڑگراہٹ میں دبی انسانیت

Storytelling is an important tool because it builds emotional connections, helps people remember information, and fosters empathy. The human history has seen rapid acceleration in progress and development over the last century. It has also provided serious challenge to very existence of human race. The machine age and current era technological advancement is a deadly combo for humanity. This story in Urdu "مشینی گڑگراہٹ میں دبی انسانیت" is about the same human tragedy of living in a city and losing humanity.

أَعُوذُ بِاللّٰهِ مِنَ الشَّيْطَانِ الرَّجِيمِ

بِسۡمِ ٱللهِ ٱلرَّحۡمَـٰنِ ٱلرَّحِيمِ

اللہ کے نام سے شروع جو بڑا مہربان نہایت رحم کرنے والا ہے

مشینی گڑگراہٹ میں دبی انسانیت

شہر کیا ہوتا ہے؛ سوائے ایک عمارات، دکانیں، سڑکیں اور ان پہ دوڑتی گاڑیاں اور ان میں پھیلے چلتے پحرتے بھاگتے دوڑتے انسان۔ ایک ایسا جدید جنگل جہاں انسان مشینوں کے زریعے ایک دوسرے کا شکار کررہے ہیں۔ شہر والوں نے بڑی بڑی گنجان آبادیاں بسا کر شکار کھیلنے کا نام زندگی کی بنیادی سہولتوں کی بکثرت فراہمی قرار دے رکھا ہے۔

شہر کوئی بھی ہو، کبھی سوتا نہیں تھا؛ بس ایک مسلسل ارتعاش کی زد میں رہتا تھا۔ جیسے دل کی ڈھرکن؛ مسلسل چلتی ہے، کبھی پر شور فشار زدہ ہوکر، اور کبھی دھیمی دھیمی؛ اور دوںوں ہی خوفناک طبعاتی مرحلے ہوتے ہیں؛ بلند فشار خون ہی کم دوںوں ہی نقصان کرتے ہیں۔ بالکل اسی طرح یہ شہر کی زندگی انسانیت کا خون کررہی ہے۔ کیونکہ اگر کوئی انسان شہر کی تیز رفتار زندگی کے ساتھ بھاگتا نہیں ہے تو اس کی موت ہوجاتی ہے۔

دھویں اور آلودگی سے اٹے آسمان پر لگے ڈیجیٹل بل بورڈز ایک ایسی خودکار دنیا کا تماشہ بیچ رہے ہوتے ہیں، جہاں انسان محض ایک پرزہ ہے اور انسانیت کی کوئی ضرورت نہیں ہوتی۔ سڑکوں پر لوگ سیمنٹ اور کنکریٹ کی تنگ گلیوں میں اس طرح رینگ رہے ہوتے ہیں، جیسے کسی بے حس وجود کی رگوں میں خون کے بے جان خلیات دوڑ رہے ہوں۔ ہر ہاتھ میں اسمارٹ فونز بج رہے ہیں؛ کانوں میں لگی ڈیوائسز ڈیٹا اگل رہی ہیں؛ اور چھوٹے چھوٹے گھر، فلیٹ اور کمرے انسانی زندگیوں کو روبوٹک مہارت سے چلا رہے ہیں۔

اس سرد اور مشینی شہری دنیا میں لاکھوں کڑوروں افراد اپنی اپنی کہانی کے ساتھ سانس لیتے ہیں اور خدا کی رحمت کی تلاش میں تن من سے دھن کی تلاش میں رہتے ہیں۔ ان ہی میں ایک شخص "برکت" بھی تھا، جو ہر روز اپنے قدم جب گھر سے باہر نکالتا تھا تو ہوش و حواس سے جانتا تھا کہ اس کا ایک ایک قدم بڑھانا مجبوری کا ہوتا تھا۔ اسے شہر کی زندگی پسند نہیں تھی؛ مگر وہ حالات کی چکی میں پسنے مجبور تھا۔ شہر کا ارتعاش اسکو ہردن کمزور کررہاتھا۔

شہر ایک مسلسل ارتعاش کی زد میں رہتا ہے؛ شہر کبھی خاموش یا ساکن نہیں ہوتا، اس کا ارتعاش مختلف شکلوں میں محسوس کیا جا سکتا ہے۔ گھروں میں متعدد آلات کا استعمال اور باہر سڑکوں پر گاڑیوں کا شور، ٹریفک کا بہاؤ، بازاروں کی رونق، فیکٹریوں کی آوازیں، اور چوبیس گھنٹے چلنے والا کاروبار؛ پھر خود انسانوں کی مسلسل چہل پہل اور انکی مسلسل چلتی زبان کا لاوا۔ لاکھوں لوگ کی امیدیں اورخواب، اور حاصل کرنے کےمقاصد کے لیے دوڑ بھاگ کامیابی و ناکامی کی کہانیاں جنم دیتی رہتی ہیں۔ دن کا اجالا ہو یا رات کی رنگینیاں، شہر کبھی پوری طرح سوتا نہیں ہے۔ یہ ارتعاش جہاں ترقی اور زندگی کی علامت ہے، وہاں بعض اوقات انسان کو تھکا بھی دیتا ہے۔

لیکن یہ ہمشہ سے ایسا نہیں تھا۔ کبھی جہاں دور افق تک پھیلے ہریالی کے وسیع میدان ہوتے تھے، وہاں اب لوہے اور شیشے کے بلند و بالا برج آسمان کا سینہ چاک کر رہے ہیں، جن کے سائے تلے نیچے کی آبادیاں مستقل خوفناک آسیب کے اندھیرے میں ڈوبی ہوئی ہیں۔ وہ ندیاں جو کبھی ٹھنڈے اور شفاف پانی سے بہتی تھیں، اب کنکریٹ کے نالوں میں تبدیل ہو چکی ہیں؛ اور جہاں کبھی پتوں کی سرسراہٹ سے فطرت گنگناتی تھی؛ اس قدرتی موسیقی کو گاڑیوں کے بریکوں کی چیخ اور ہائی وولٹیج ٹرانسفارمرز کے لامتناہی شور نے نگل لیا ہے۔

بنی نوع انسان نے رابطے (کونک ٹیویٹی) کی ایک بہترین دنیا تو کھڑی کر لی ہے، لیکن آپس کا تعلق (کونکشن) بالکل کھو دیا ہے۔ مٹی کو چھوڑ کر سلیکون کو اپنانے کی اس دوڑ میں لوگ پتھر کے ہو چکے ہیں؛ جو اپنے پڑوسی کی تکلیف سے اندھے اور مزدور طبقے کی خاموش بے بسی سے بالکل بہرے ہیں۔

ڈیجیٹل دور کی اس عظیم مشینری نے انسان کو آزاد کرنے کا وعدہ تو کیا تھا، لیکن اس نے انسان کو خود غرضی اور مادی ہوس کی زنجیروں میں جکڑ دیا ہے۔ یہ ایک ایسی دنیا بن چکی تھی جہاں ایک شاعر کی تڑپتی ہوئی آواز پہلے سے کہیں زیادہ سچی لگتی تھی:۔

تنویرؔ اب تو حلق سے بھونپو کا کام لے

بہرے ہوئے ہیں کان مشینوں کے شور سے

برکت کو اپنا گاوں پسند تھا اور وہ طبعتا" سکون پسند تھا؛ اور ٹہر ٹہر کر آہستہ آہستہ ہر لمحے کو جینا چاہتا تھا۔ مگر اس کے علاقے کے بدمعاشوں نے اس کی زمین پر قبضہ کرلیا تھا اور وہ جان بچا کر شہر میں آن بسا تھا۔ مگر اس کا جسم تو شہر میں ہوتا تھا؛ مگر اسکی روح اور وہ خود گاوں میں رہتے تھے۔

گاؤں کی زندگی برکت کو وہ سب کچھ دیتی تھی جو شہر کبھی نہیں دے سکتا تھا۔ گاؤں میں گھڑی کی سوئیاں انسان کو نہیں ہنکاتیں، وہاں وقت آہستہ اور پرسکون گزرتا ہے۔ صبح کی پہلی کرن، دور دور تک پھیلے کھیتوں میں لگی فصل اور اِدھر اُدھر لحے درختوں کی سرسراہٹ، اور شام کا سکون؛ ار رات کو پورا چاند کا حسن؛ الغرض وہاں ہر لمحے کو محسوس کیا جا سکتا ہے۔ شہر کے مصنوعی ارتعاش کے برعکس، گاؤں میں زندگی فطرت کی دھیمی اور پرسکون لہر پر چلتی ہے۔ برکت کے لیے اس کا گاؤں صرف ایک جگہ نہیں، بلکہ ذہنی اور روحانی سکون کا ایک پناہ گاہ تھا، جہاں وہ اپنی مرضی کی رفتار سے زندگی گزار سکتا تھا۔

لیکن وہ مجبور تھا۔ اسکی جان کی دشمنوں نے اس کے جسم اور روح کے لیے قید خانہ کا سبب کر رکھا تھا۔

ٹیکسٹائل مل میں چلتے ہوئے بھاری لومز (لوہے کے کھڈیوں) کی دھمک فرش سے ہوتی ہوئی برکت کی دکھتی ہوئی ہڈیوں میں اتر جاتی تھی۔ باہر جدید شہر ڈیجیٹل رفتار سے چمک رہا تھا، لیکن فیکٹری کے اندر وہی پرانی، بے رحم داستان دہرائی جا رہی تھی۔

برکت نے اپنے مٹیالے اور گریس سے سنے ہاتھوں کو دیکھا۔ اسے اپنے ماضی کا وہ دیہات یاد آیا جہاں جوانی میں یہی ہاتھ نرم اور نم مٹی میں ہل چلاتے تھے۔

اسے فصل کی کٹائی کی وہ تھکا دینے والی مگر پاکیزہ مشقت یاد آئی—ایک ایسا منظر جو گندم کے سنہرے رنگوں اور مٹی کی سوندھی خوشبو سے سجا تھا، جہاں ہوا میں بارش اور پھولوں کی مہک رچی ہوتی تھی۔ اور وہی مہک اس کی روح میں سمائی ہوئی تھی۔

تب جب سورج غروب ہوتا، تو جسم کی تھکن میں ایک عجیب سکون ہوتا تھا۔ وہ کھلے آسمان تلے تاروں کی چھاؤں میں چارپائی پر لیٹتا، رات کی ٹھنڈی ہوا اسے اپنی آغوش میں لیتی اور اسے زمین سے جڑی اپنی ذات کا احساس ہوتا۔

جیسا کہ مرحوم شاعر تنویر سپرا نے لکھا تھا، ایسا لگتا تھا جیسے رات خود ایک ماں ہے جو دن بھر کے تھکے ہارے مزدور کو اپنی گود میں سلا رہی ہو:۔

اے رات مجھے ماں کی طرح گود میں لے لے

دن بھر کی مشقت سے بدن ٹوٹ رہا ہے

برکت کو مجبوری سے ہجرت کرنا پڑی تھی اور صنعتی شہر کے کنکریٹ کے جال میں آنا پڑا تھا؛ مگر اس نے دیکھا کہ کیسے شہر پھیلتا جارہاتھا اور کارپوریٹ کمپنیوں کے قبضوں نے آس پاس کے گاؤں کی زمینوں کو بنجر کررہا تھا۔ یہاں آسمان پر تاروں کی جگہ دھوئیں نے لے لی تھی، اور رات محض اگلی شفٹ شروع ہونے سے پہلے کا ایک مختصر سا وقفہ بن کر رہ گئی تھی۔

برکت کپڑا بننے کا ماہر تھا۔ وہ اپنے ہاتھوں سے مصنوعی باریک تاروں کو نفیس اور جدید سمارٹ فیبرک میں ڈھالتا تھا—وہ اپنے ہاتھوں سے امراء کے لیے عیش و عشرت کا سامان بناتا تھا۔ لیکن، جیسا کہ تنویر سپرا کے اشعار اکثر اس کے ذہن میں گونجتے تھے، وہ تو بس لوہے کی ناف سے "کستوری" پیدا کر رہا تھا، جس کی خوشبو اور منافع مل مالک اڑا لے جاتا تھا:۔

آج بھی سپراؔ اس کی خوشبو مل مالک لے جاتا ہے

میں لوہے کی ناف سے پیدا جو کستوری کرتا ہوں

برکت کے حصے میں صرف چند لقمے آتے تھے، جن سے بمشکل اس کے چھوٹے سے کرائے کے کمرے میں معمولی زندگی کا خرچہ چلتا تھا۔

اس شام جب برکت گھر لوٹا، تو اس کے کان اب بھی مشینوں کے شور سے گونج رہے تھے۔ اس نے دروازہ کھولا تو دیکھا کہ اس کا دس سالہ بیٹا، بلال، اسکرین کے سامنے مگن بیٹھا ایک چمکدار اور مہنگے ڈیجیٹل گیمنگ کنسول کا اشتہار دیکھ رہا ہے۔

بلال نے سر اٹھا کر باپ کی طرف دیکھا، اس کی آنکھوں میں ایک جانی پہچانی حسرت تھی۔

"ابا! کیا ہم یہ لے سکتے ہیں؟ بس ایک بار؟"

برکت کے دل میں ایک تیز چھنک اٹھی۔ دہائیوں پہلے، جب وہ گاؤں میں ننگے پاؤں پھرتا ایک بچہ تھا، وہ بھی شہر کی دکانوں کے شیشوں سے لٹکے ان ٹین کے سستے کھلونوں کو حسرت سے دیکھتا تھا جو اسے کبھی نہ مل سکے۔

نسلیں بدل گئیں، زرعی دنیا ڈیجیٹل سلطنت میں بدل گئی، لیکن محرومی کا یہ چکر نہ ٹوٹ سکا۔ مزدور کا بچہ آج بھی اسی طبقاتی تقسیم کی دلدل میں پھنسا ہوا تھا جو امیر اور غریب کو الگ کرتی ہے۔

سپرا نے اس لامتناہی درد کو کتنی خوبصورتی سے سمیٹا تھا:۔

میں اپنے بچپنے میں چھو نہ پایا جن کھلونوں کو

انہی کے واسطے اب میرا بیٹا بھی مچلتا ہے

وہاں کھڑے کھڑے برکت کے ذہن میں مستقبل کا ایک نقشہ پھیل گیا۔ اسکا تعلق گاوں سے تھا۔ مگر اس کا بچہ اب گاوں نہیں جاسکتا۔ وہ شہری ہی رہے گا۔ مگر کیا یہ امیر و غریب کا فرق ایسے ہی چلے گا؟ مزدور اور سیٹھ کا رشتہ ایسے ہی چلے گا اور کیا اس کے بچوں کی ہڈیاں بھی اسے طرح کمزور ہوتی رہیں گی؟

برکت کا یہ اندرونی تضاد اور خوف اس باپ کا ہے جو اپنے بچے کو شہر کے اس بے رحم نظام سے بچانا چاہتا ہے، لیکن یہ بھی جانتا ہے کہ اب پیچھے مڑنے کا کوئی راستہ نہیں ہے۔

برکت نے بلال کے چھوٹے سے ہاتھ کو دیکھا۔ وہی ہاتھ جو شاید کل کو کسی فیکٹری، کسی کارپوریٹ آفس کے کیوبیکل، یا کسی تعمیراتی سائٹ پر ایک مزدور کی طرح مشینوں کا پیٹ بھرنے کے لیے چلیں گے۔ اسے لگا کہ شہر ایک ایسا بڑا اژدہا ہے جو دیہاتوں سے آنے والے معصوم بچوں کے خون اور ہڈیوں کو ایندھن بنا کر اپنی اونچی عمارتوں کو کھڑا رکھتا ہے۔ سیٹھ اور مزدور کی یہ خلیج صدیوں پرانی تھی، لیکن ڈیجیٹل دور نے اس دوری کو مزید گہرا کر دیا تھا۔

برکت گاؤں کی "روح" کو اس شہر میں زندہ رکھنا چاہتا تھا۔ وہ بلال کو سکھائے گا کہ اس بے حس مشینری کا حصہ بننے کے بجائے وہ ایک ایسا انسان بنے جو دوسروں کے دکھ درد کو سمجھے۔ وہ امیر اور غریب کے اس فرق کو مٹانے کے لیے الگورتھم نہیں، بلکہ انسانی ہمدردی کے اصول سیکھے گا۔ اس نے سوچا کہ ایسا کیا ہو کہ یہ چکر رک جائے اور اس کی آئندہ نسلیں بہتر انسانی زندگی گزار سکیں؟

برکت نے سوچا کہ بلال کو ایسی تعلیم دلانی ہوگی جو اسے صرف "سیٹھ کا ملازم" یا ایک کارپوریٹ روبوٹ نہ بنائے۔ تعلیم صرف پیسہ کمانے کی مشین بننے کے لیے نہ ہو، بلکہ اس میں سماجی شعور اور اخلاقیات شامل ہوں۔ اس نے چاہا کہ بلال بڑا ہو کر نظام کا حصہ بننے کے بجائے نظام کو بدلنے والا بنے۔

برکت نے سوچا کہ شہر کے اس تیز رفتار ارتعاش کے اندر رہتے ہوئے بھی اپنے گھر اور برادری کو ایک پرسکون جزیرے میں بدلنا ہوگا۔ مشینوں اور اسکرینز کا وقت محدود کر کے آپس میں بیٹھنے، دکھ سکھ سانجھے کرنے اور مکالمے کی روایت کو زندہ رکھنا ہوگا۔ اسکی نئی نسل کے دلوں سے ہمدردی اور محبت ختم نہیں ہونی چاہیے؛ جس سے ان کی روحیں سرد ہونے سے بچ جائیں گی۔

شہری زندگی کی مادیت پرستی کے اس بوجھ کو کم کرنے کا واحد حل یہ ہے کہ انسان اپنی ضرورتوں کو محدود کرے ۔ "مزید پانے کی اندھی دوڑ" سے خود کو باہر نکالنا ہوگا۔جب انسان سستے گیجٹس اور برانڈز کی غلامی چھوڑ دیتا ہے، تو وہ سیٹھ کے آگے گھٹنے ٹیکنے پر مجبور نہیں ہوتا۔

برکت اپنے بیٹے کے پاس بیٹھ گیا اور اس نے اپنا کھردرا ہاتھ بلال کے چھوٹے سے کندھے پر رکھا۔ اس نے اپنے اس چھوٹے سے کمرے پر نظر دوڑائی جو سستے گیجٹس، تاروں اور مادیت پرستی کے بوجھ سے دبا ہوا تھا۔

معاشرے نے انسانیت کا سودا مشینوں سے کر لیا تھا، اور امیر و غریب کا یہ فاصلہ ایک نہ عبور ہونے والی خلیج بن چکا تھا۔

برکت بولا "بلال،" برکت کے لہجے میں نرمی تھی، لیکن اس کی آواز شہر کے دور دراز ٹریفک کے شور کو چیرتی ہوئی ابھری۔

"یہ باہر لگی مشینیں اونچی عمارتیں اور تیز رفتار کمپیوٹر تو بنا سکتی ہیں، لیکن یہ محبت پیدا نہیں کر سکتیں۔ یہ کسی بے چین دل میں سکون کا رنگ نہیں بھر سکتیں۔"

بلال نے اسکرین بند کر دی اور غور سے باپ کی بات سننے لگا۔

برکت نے کہا "ہماری دنیا اس لیے سرد ہو رہی ہے کیونکہ لوگ ایک دوسرے سے بات کرنا بھول گئے ہیں"؛ برکت نے پوری انسانیت کے سانجھے درد کو زبان دی۔

"اگر ہم نے اپنی اگلی نسلوں کے لیے صرف یہ لالچ اور نئی مشینیں ہی ورثے میں چھوڑیں، تو تمہارے بچے اس سے بھی زیادہ تاریک دنیا میں جئیں گے۔ ہمیں دوبارہ انسانیت کو مقدم رکھنا ہوگا۔ ہمیں ایک ساتھ بیٹھنا ہوگا، ایک دوسرے کی آنکھوں میں دیکھنا ہوگا، اور اس طبقاتی خلیج کو کسی الگورتھم سے نہیں بلکہ اپنے جذبوں اور گفت و شنید سے مٹانا ہوگا"۔

برکت نے ایک گہرا سانس لے کر کہا؛ "بلال، یہ چکر تبھی رکے گا جب ہم شہر کی رفتار سے دوڑنا بند کر دیں گے اور اپنی رفتار خود طے کریں گے"۔۔

بہتے وقت کے ایک سمے کے لیے شاید پہلی بار، اس کمرے میں موجود ڈیجیٹل شور پسِ منظر میں غائب ہو گیا۔ اس چھوٹے سے گھر کی پرسکون گرمجوشی میں، ایک باپ اور بیٹے نے بات کرنا شروع کر دی، اور ایک بہتر، زیادہ انسان دوست، کَل کے لیے چھوٹے اور نازک بیج بو دیے گئے۔