تیری آنکھوں کے سوا دنیا میں رکھا کیا ہے

ماں بننا ایک اتنا بڑا افتخار و اعزاز ہے کہ اس کے سامنے دنیا کے باقی سب اعزازات، اسناد ماند پڑجاتی ہیں۔ ہم ماں کی پرورش سے بڑے ہوتے ہیں سو اس نے ہمارے سب رنگ دیکھ رکھے ہوتے ہیں مگر ایسا کیا ہے جسے ہماری آنکھیں دیکھ نہیں پاتیں؟ ماں ہمیں چلنا سکھاتی ہے،کھانا سکھاتی ہے، بولنا سکھاتی ہے، اٹھنا سکھاتی ہے،سلا کر خود جاگتی ہے اور ایک بار بھی محسوس ہونے نہیں دیتی کہ اسے بھی کوئی تکلیف ہو سکتی ہے۔ یہاں تک کہ ہم جوان ہوکر ماں سے دور جابستے ہیں؛ اس دم اس کی آنکھ میں دیکھ پائیں تو جانیں کہ وہ کیا غم ہے جو اس کی آنکھوں میں چھپا ہوتا ہے؟