شامِ شہرِ یاراں: آستیں کے ایناکونڈا

أَعُوذُ بِاللّٰهِ مِنَ الشَّيْطَانِ الرَّجِيمِ

بِسۡمِ ٱللهِ ٱلرَّحۡمَـٰنِ ٱلرَّحِيمِ

اللہ کے نام سے شروع جو بڑا مہربان نہایت رحم کرنے والا ہے

شامِ شہرِ یاراں: آستیں کے ایناکونڈا

کہنے کو تو نامور شاعر احمد فراز فرما گئے کہ "گرفتہ دل ہے بہت شامِ شہرِ یاراں آج، کہاں ہے تُو کہ تجھے حالِ دلبرا لکھوں"، لیکن سچ پوچھیے تو آج کے دور میں شامِ شہرِ یاراں گرفتہ دل صرف اس لیے ہوتی ہے کہ کیفے کا بل کس کے حصے میں آئے گا۔ فراز صاحب تو اداس ہو کر خط لکھنے کا سوچ رہے تھے، مگر آج کا دلبرا (یعنی دوست) واٹس ایپ پر آپ کا طویل جذباتی میسج دیکھ کر اسے 'سین' کرتا ہے اور جواب میں صرف ایک نیلا تھمبز اپ بھیج کر آپ کے جذبات کا جنازہ نکال دیتا ہے۔ آج کے "دلِ مسافر" کو رہ و منزل کا ماجرا لکھنے کی ضرورت ہی نہیں پڑتی، کیونکہ اس نے انسٹاگرام پر اسٹیٹس ڈال کر پہلے ہی پورے شہر کو باخبر کر دیا ہوتا ہے۔

پھر کچھ دوست ایسے دوراندیش ہوتے ہیں جن کے لیے شاعر نے کہا تھا:۔۔

چال چلنے میں تو نے جلدی کی

میں نے ویسے بھی ہار جانا تھا

یہ وہ شاطر دوست ہیں جو لڈو اسٹار کھیلتے ہوئے یا زندگی کے کسی بھی امتحان میں، اپنی باری آنے پر ایسی چال چلتے ہیں جیسے سلطنتِ عثمانیہ کا تخت بچا رہے ہوں۔ حالانکہ انہیں معلوم ہونا چاہیے کہ سامنے والا ویسے بھی سست انسان ہے، اس نے پیزا کا آخری سلائس لینے کی دوڑ میں ویسے ہی ہار جانا تھا، مگر ان کو ہر جگہ بساط بچھانے کی جلدی ہوتی ہے۔

جہاں تک تعلق ہے شوقِ سفر اور ڈوبنے والوں کے جذبے کا، تو وہ کچھ یوں ہے کہ "کشتی نہ بدلی؛ دریا بھی نہ بدلا، اور ڈوبنے والوں کا جزبہ بھی نہ بدلا"۔ یہ مصرعے ان دوستوں پر صادق آتے ہیں جو پچھلے دس سال سے ہر گرمی کی چھٹیوں میں "نتھیا گلی" جانے کا پلان بناتے ہیں۔ سال بدل جاتے ہیں، بجٹ بدل جاتے ہیں، دوستوں کی شادیاں ہو جاتی ہیں، مگر ان کا وہ پلان اور دریا میں ڈوبنے کا جزبہ نہیں بدلتا۔ وہ اسی پرانی ویگن کی کشتی میں بیٹھ کر اسی پرانے ٹریفک جام کے دریا میں پھنسنے کے لیے تیار رہتے ہیں، اور بار بار عشق میں دھوکا کھانے کے باوجود کہتے ہیں، "پیار بھی نہ پایا اور یار بھی نہ بدلا"۔۔

دوسری طرف، منیر احمد صاحب نے جن احباب کا نقشہ کھینچا ہے، وہ تو ایک الگ ہی مخلوق ہیں:۔۔

بظاہر ساتھ چلتے تھے مرے کچھ یار ایسے تھے

مِرے ہونے سے جلتے تھے مرے کچھ یار ایسے تھے

منیر صاحب کا یہ مصرعہ کہ "منیر اُن کو سمجھنے میں لگی ہے دیر آخر کیوں؟ جو میرے غم سمجھتے تھے مرے کچھ یار ایسے تھے"، اس وقت پوری طرح سمجھ آتا ہے جب آپ کی دوستی کے بیچ "ٹاک ٹاک" کرتی ملکی سیاست آ جائے۔

میرا ایک لنگوٹیا یار ہے— چوہدری عابد۔ بچپن سے لے کر جوانی تک ہمارا یہ حال تھا کہ ایک ہی موٹر سائیکل پر چالان کٹواتے تھے، مگر پچھلے الیکشن کیا آئے، ہماری دوستی پر کسی سیاسی ٹاک شو کے پینل جیسی نحوست چھا گئی۔ وہ مروجہ حکومت کا کٹر حامی بن گیا، اور میں اپوزیشن کا اسپیڈو میٹر۔ ایک دن چائے کے ہال پر بحث اتنی بڑھی کہ بات "تمہارے لیڈر نے ملک لوٹ لیا" سے ہوتی ہوئی "تمہارا تو پورا خاندان ہی صومالیہ کا لگتا ہے" تک جا پہنچی۔ عابد نے غصے میں چائے کی پیالی میز پر پٹخی اور بولا: "آج کے بعد تم مرو یا میں, ایک دوسرے کی شکل نہیں دیکھیں گے!" میں نے بھی خودداری کا پرچم بلند کرتے ہوئے کہا: "جاؤ، تمہارے جیسے فاشسٹ سے تو بات کرنا ہی گناہ ہے!"۔۔۔

اس دن کے بعد واٹس ایپ گروپس سے لیفٹ مارا گیا اور گلی میں آمنا سامنا ہونے پر ہم دونوں اس طرح گردن موڑ کر گزرتے جیسے ایک دوسرے کو نہیں، بلکہ کسی بھوت کو دیکھ لیا ہو۔ منیر صاحب کے مطابق وہ واقعی بظاہر ایسے یار بن چکے تھے جو میرے ہونے سے جلتے تھے اور جن کے نفسیاتی مسائل نے ہنستی کھیلتی دوستی کو الیکشن کمیشن کا دفتر بنا دیا تھا۔

تقریباً ڈیڑھ سال اسی اکھاڑ پچھاڑ میں گزر گیا۔ پھر ایک صبح اکٹھا میرے گھر پر کہرام مچ گیا۔ میری والدہ، جنہیں پورا محلہ محبت سے "خالہ جی" کہتا تھا، طویل علالت کے بعد اکٹھا خالقِ حقیقی سے جا ملیں۔ اس وقت مجھ پر جیسے غم کا پہاڑ ٹوٹ پڑا۔ دماغ سن تھا، رشتہ دار دور تھے، اور میں گھر کے صحن میں اکیلا بیٹھا آنسو بہا رہا تھا کہ محلے داروں کو کیسے اکٹھا کروں؟ ابھی اس حادثے کو آدھا گھنٹہ بھی نہیں ہوا تھا کہ گلی میں ایک موٹر سائیکل آ کر رکی۔ میں نے نظر اٹھا کر دیکھا تو سامنے عابد کھڑا تھا۔ وہی عابد، جو سیاست کے نام پر مجھ سے منہ موڑ چکا تھا۔

اس نے نہ کوئی سیاسی شکوہ کیا، نہ پرانی ناراضگی کی دیوار بیچ میں لایا۔ وہ بھاگتا ہوا آیا، اس کی آنکھوں میں بھی آنسو تھے، اس نے سیدھا مجھے گلے سے لگا لیا۔ اس نے آتے ہی کمان سنبھالی: "تم اندر بیٹھو، میں باقی سب دیکھتا ہوں!" اگلے چند گھنٹوں میں عابد نے محلے کے لڑکے اکٹھے کیے، گورکن سے بات کی، غسل اور کفن کا انتظام کرایا۔ اور پھر جب جنازہ اٹھنے کا وقت آیا، تو عابد سب سے آگے تھا۔ خالہ جی کی میت کو سب سے پہلا کندھا اسی ناراض یار نے دیا تھا، کیونکہ وہ جانتا تھا کہ سیاست کی بحث اپنی جگہ، لیکن "خالہ جی" کا رشتہ اور یار کا غم الیکشن کے نظریات سے بہت بڑا ہے۔ کندھا دیتے ہوئے اس کے چہرے پر وہی پرانا خلوص تھا، جس کا اعتراف منیر احمد نے شعر کے آخری حصے میں کیا ہے کہ: "اگرچہ یوں بھی تھا لیکن، اُنھی احباب میں وہ تھے، جو مجھ پر جاں چِھڑکتے تھے..."

جنازگاہ سے واپسی پر میں نے اس کا ہاتھ پکڑ کر کہا: "یار عابد، مجھے تجھے سمجھنے میں اتنی دیر کیوں لگی؟" اس نے مسکرا کر میرے کندھے پر ہاتھ رکھا اور طنزیہ لہجے میں دھیمے سے بولا: "کیونکہ تم ہو ہی عقل کے اندھے! اب چلو، گھر چلو، مہمانوں کے لیے روٹی کا بندوبست کرنا ہے"۔۔۔

مگر ٹھہریے! جہاں عابد جیسے مخلص یار بھی مل جاتے ہیں، وہاں اسی غزل کا ایک اور مصرعہ ہمارے معاشرے کے ایک اور حقیقت پسندانہ چہرے کو بے نقاب کرتا ہے:۔۔۔

رہا کرتے تھے میری آستیں میں سانپ کی صورت

وہ مجھ کو ڈستے رہتے تھے مرے کچھ یار ایسے تھے

منیر صاحب نے جب آستیں کے سانپوں کا ذکر کیا تھا، تو شاید ان کا اشارہ اُن "فنانشل سانپوں" کی طرف تھا جن کی دوستی کا نعرہ صرف اس وقت تک گونجتا ہے جب تک آپ کی جیب میں نوٹ کڑکڑا رہے ہوتے ہیں۔ یہ وہ احباب ہیں جن کا محبت نامہ آپ کے بینک بیلنس کے ساتھ جڑا ہوتا ہے۔ جیسے ہی آپ کی جیب میں "گاندھی" یا "قائدِ اعظم" کی تصویر والے نوٹ جلوہ گر ہوتے ہیں، ان کی وفاداری کسی وفادار سائے کی طرح آپ کے ساتھ چمٹ جاتی ہے۔

ان دوست نما سانپوں کی کچھ مروجہ نشانیاں درج ذیل ہیں:۔۔۔

• منسلک یوٹیلیٹی بلز : یہ دوست کبھی اکیلے چائے پینے نہیں آئیں گے۔ یہ ہمیشہ اس وقت نمودار ہوں گے جب آپ نے پیزا کا آرڈر دیا ہو یا سیلری کریڈٹ ہونے کا میسج فیس بک پر غلطی سے "احساسِ تشکر" کے ساتھ پوسٹ کر دیا ہو۔ ان کا نعرہ ہوتا ہے: "بھائی بھائی کا مال، سب کا مال!" مگر جیسے ہی بل دینے کی باری آتی ہے، یہ آستیں کے سانپ اچانک تسبیح پڑھنے لگتے ہیں یا ان کا فون بج اٹھتا ہے اور یہ "بہت ضروری کال" سننے باہر چلے جاتے ہیں۔

• نوٹ ختم، نعرہ ختم: جب تک آپ کے پاس پیسے ہیں، آپ ان کے لیے "یاروں کے یار"، "سخی بادشاہ" اور "محفل کی جان" ہیں۔ لیکن خدا نہ کرے کہ مہینے کا آخری ہفتہ ہو اور آپ کی جیب مٹی کے برتن کی طرح خالی ہو، تو یہی سانپ ایسا ڈنگ مارتے ہیں کہ آپ کو پہچاننے سے بھی انکار کر دیتے ہیں۔ آپ واٹس ایپ پر میسج کریں کہ "یار سو روپے کا ایزی لوڈ کرا دو"، تو جواب آتا ہے: "برو! نیٹ ورک کا بڑا ایشو ہے، آواز نہیں آ رہی۔" (حالانکہ میسج ٹیکسٹ میں ہوتا ہے!)۔۔۔

• نفسیاتی ڈنگ: منیر صاحب نے بالکل سچ کہا تھا کہ "اذیّت دے کے ہنستے تھے"۔ ان دوستوں کی اذیت یہ ہوتی ہے کہ یہ آپ کے پیسوں پر عیاشی بھی کریں گے اور بعد میں محلے میں جا کر کہیں گے: "قاسم کے پاس پیسہ تو آگیا ہے، پر دل بہت چھوٹا ہے اس کا، کل چائے کا بل دیتے ہوئے اس کے ہاتھ کانپ رہے تھے!" یہ وہ ڈنگ ہے جو آستیں کا سانپ آپ کا سارا مال ہضم کرنے کے بعد مارتا ہے۔

حقیقت تو یہ ہے کہ جب تک جیب گرم ہے، یہ سانپ آپ کی آستیں میں سردیوں کی دھوپ کی طرح سکون سے بیٹھے رہیں گے اور جیسے ہی جیب میں خزاں آئی، یہ کسی اور "گرین کارڈ" ہولڈر آستیں کی تلاش میں رینگ جائیں گے۔۔۔۔

منیر احمد نے شاید اسی لیے آخر میں رو کر کہا تھا کہ انہیں سمجھنے میں دیر لگی، کیونکہ انسان جب تک امیر رہتا ہے، اسے ہر سانپ ریشم کا کیڑا نظر آتا ہے، اور جب غریب ہوتا ہے، تب پتا چلتا ہے کہ جنہیں وہ یار سمجھ رہا تھا، وہ دراصل "فائنانشل ایناکونڈا" تھے!۔۔

کیف بھوپالی صاحب نے عشق و محبت کی وادیوں میں گھومتے ہوئے بڑی معصومیت سے فرمایا تھا:۔۔۔

برا نہ مان اگر یار کچھ برا کہہ دے

دلوں کے کھیل میں خودداریاں نہیں چلتیں

ان کا اشارہ تو یہ تھا کہ یار کی ناراضگی اور اس کی کڑوی باتوں کو دل پر نہیں لینا چاہیے، کیونکہ محبت میں ایگو یا انا کی کوئی گنجائش نہیں ہوتی۔ مگر میرے یارو! آج کے دور میں جب ہم اپنے اردگرد دیکھتے ہیں، تو محسوس ہوتا ہے کہ ہم نے اس فلسفے کو کچھ زیادہ ہی سنجیدگی سے لے لیا ہے، لیکن ایک بالکل ہی غلط رخ پر!۔۔۔

ہم نے دنیا اور دنیا والوں کی خوشنودی کی خاطر اپنے دلوں سے ہر قسم کی غیرت، خودداری اور ایمانی حمیت کو نکال باہر کیا ہے۔ ہم دنیا کے سامنے تو سر جھکائے کھڑے ہیں، مگر اس حقیقی مالک کے سامنے سر اٹھائے پھرتے ہیں جس نے ہمیں پیدا کیا۔ آج کل ہم دنیا بھر میں جو ذلت، رسوائی اور پستی اٹھا رہے ہیں، اس کی سب سے بڑی وجہ یہی ہے کہ ہم نے اپنے اصل مرکز کو چھوڑ دیا ہے۔ ہم نے دلوں کے کھیل میں دنیاوی یاروں اور مفادات کی خاطر تو خودداریاں ختم کر دیں، لیکن اپنے رب کے ساتھ وفاداری کا رشتہ بھی توڑ دیا۔ اسی تلخ حقیقت پر کسی نے کیا خوب ماتم کیا ہے:۔۔

شرک و الحاد میں ڈوبے ہوئے انسان ہیں ہم

بس نام کے دنیا میں ہی مسلمان ہیں ہم

ہم نے اسلام کا لبادہ تو اوڑھ رکھا ہے، مگر ہمارے دل دنیاوی مفادات، مال و دولت کی محبت، اور سستے نظریات کے "شرک و الحاد" میں ڈوبے ہوئے ہیں۔ کیف صاحب نے تو بندوں کی محبت میں خودداری چھوڑنے کو کہا تھا، مگر ہم نے تو خالقِ کائنات کے احکامات کے سامنے اپنی انا کو کھڑا کر دیا ہے، اور یہی ہماری اصل تنزلی کی بنیاد ہے۔ جب تک ہماری جیبوں اور دلوں کا یہ تضاد ختم نہیں ہوتا، تب تک دنیا کے اس بازار میں ذلت ہمارا مقدر رہے گی۔

خلاصہ یہ ہے کہ شہرِ یاراں کی شام کتنی ہی گرفتہ دل کیوں نہ ہو، ان نمونوں کے بغیر زندگی کا یہ اداس سفر کٹنا نامکن ہے، بشرطیکہ ہم اپنے اصل مالک کو نہ بھولیں اور آستیں کے سانپوں کی پہچان وقت پر کر لیں۔