Skip to content
Muhammad Asif Raza 16 minutes ago
Muhammad Asif Raza

قوم اور فرد کی خودی

Story in Urdu "قوم اور فرد کی خودی" set within the historic halls of Government Gordon College, The Selfhood of the Nation and the Individual weaves a compelling philosophical dialogue between a seasoned professor and his three perceptive students. Tracing the intellectual journey from the collapse of the Soviet Union and Alexander Dugin’s radical critique of Western modernity to the profound insights of Abdel Wahab El-Messiri, the story explores the hidden crisis of mental colonization. Ultimately, "قوم اور فرد کی خودی" bridges global geopolitics with Allama Iqbal’s timeless philosophy of Khudi, offering a powerful message on spiritual awakening and civilizational revival.

أَعُوذُ بِاللّٰهِ مِنَ الشَّيْطَانِ الرَّجِيمِ

بِسۡمِ ٱللهِ ٱلرَّحۡمَـٰنِ ٱلرَّحِيمِ

اللہ کے نام سے شروع جو بڑا مہربان نہایت رحم کرنے والا ہے


قوم اور فرد کی خودی


گورنمنٹ گورڈن کالج شہر کی سوا سو سال پرانی تعلیمی درسگاہ ہے اور اس کی پہچان اس علاقے کے سیاسی شعور اور سیاستدانوں کی نرسری کے طور پر رہی ہے۔ تاریخ، فلسفہ اور پولیٹیکل سائنس کے مضامین کی تدریس اور حصول کے لیے یہ ہمیشہ سے اساتذہ اور طالب علموں کا پسندیدہ مرکز رہا ہے۔ ابھی سردیوں کے دن شروع ہو رہے تھے اور کالج کے سیاسیات کی کلاس جاری تھی اور جدید دور کا ذکر چل رہا تھا۔ پروفیسر صدیقی اپنی عینک سنبھالتے ہوئے، ضخیم کتابیں میز پر رکھے، دیوارِ برلن کے گرنے کے بعد بدلتے ہوئے روس اور عالمی منظرنامے کی بات کر رہے تھے، اور ان کے تین ہونہار شاگرد اس بحث میں بھرپور حصہ لے رہے تھے: زید، جو تاریخ اور اقبالیات کا دلدادہ تھا؛ کاشف، جو ہر واقعے کو جدید نفسیات کی عینک سے دیکھنے کا عادی تھا؛ اور رافع، جو جنریشن زی کا نمائندہ، ہاتھ میں آئی پیڈ لیے ہر چیز کو ڈیجیٹل دنیا اور مستقبل کے زاویے سے پرکھتا تھا۔

پروفیسر صدیقی نے چاک بورڈ پر ایک لکیر کھینچی اور کمرے میں پھیلی خاموشی کو توڑتے ہوئے گویا ہوئے، "عزیز طلبہ، 1980 کی دہائی کے آخر میں سوویت یونین کے آخری صدر میخائل گورباچوف نے اپنی معیشت اور نظام کو بچانے کے لیے مغربی طرز کی دو بڑی اصلاحات متعارف کرائیں: گلاسنوست یعنی سیاسی کھلا پن، اور پیریستروئیکا یعنی معاشی و انتظامی ڈھانچے کی تشکیلِ نو۔ لیکن مغربی جدیدیت کے ان تصورات کو اپنے نظام میں اتارنے کا نتیجہ الٹا نکلا۔ جو ریاست دہائیوں تک ایک ناقابلِ تسخیر سپر پاور سمجھی جاتی تھی، وہ اندر سے کھوکھلی ہو کر تاش کے پتوں کی طرح دھڑام سے گر گئی۔ دیوارِ برلن کے گرنے اور سوویت یونین کے اس اچانک انہدام کے بعد مغرب نے اعلان کیا کہ اب تاریخ کا خاتمہ ہو چکا ہے اور لبرل جمہوریت ہی انسانیت کی آخری منزل ہے۔ لیکن شکست خوردہ ماسکو کے ایوانوں سے ایک ایسی آواز اٹھی جس نے اس پورے بیانیے کو چیلنج کر دیا۔ یہ آواز روسی فلسفی الیگزینڈر ڈوگن کی ہے۔ اس نے ایک نیا نعرہ بلند کیا کہ روس اور مغرب کو جدیدیت سے چھٹکارا حاصل کرنا ہوگا! یاد رہے کہ اس جدیدیت نے آج کے انسان کو بظاہر سب کچھ دے رکھا ہے، لیکن ڈوگن کا یہ اعلان اس پوری جدیدیت کی کھلی نفی تھا۔۔۔ اور بس، پوری فکری دنیا میں ایک شور مچ گیا!"۔۔۔


رافع نے اپنے آئی پیڈ کی اسکرین پر انگلیاں چلاتے ہوئے حیرت سے فوراً سوال اٹھایا، "سر، شور تو مچنا ہی تھا! گورباچوف نے تو لوگوں کو آزادی دینے کی کوشش کی تھی، اور جدیدیت نے آج کے انسان کو ٹیکنالوجی، سہولیات اور انفرادی آزادی سب کچھ دیا ہے۔ پھر ڈوگن اس سب کی نفی کر کے دنیا کو پیچھے کیوں دھکیلنا چاہتے ہیں؟"۔۔

پروفیسر صدیقی مسکرائے اور کہا، "دیکھو رافع، دیوارِ برلن گرے اور اس نام نہاد نئے عالمی نظام کو آئے تین دہائیاں گزر چکی ہیں، مگر انسانوں کے مسائل کم ہونے کے بجائے بڑھتے ہی چلے جا رہے ہیں۔ تبھی تو ڈوگن کو یہ کہنا پڑا کہ مسئلہ کہیں اور ہے! تو آپ کے خیال میں کیا ہو سکتا ہے یہ مسئلہ؟ میاں کاشف، آپ بتائیے!"۔۔۔


کاشف نے اپنی ٹھوڑی پر ہاتھ رکھتے ہوئے نفسیاتی اور عمرانیاتی زاویے سے تفصیلی بات شروع کی، "سر، ڈوگن کے فلسفے کی جڑ ہی یہی ہے کہ تمام جدید سیاسی نظریات میں ایک ہی مہلک خامی مشترک ہے، اور وہ ہے 'روایت'، 'مقدسات'، اور 'حقیقی و مستند عیسائیت' سے انکار۔ رافع جس خود مختار 'فرد' کا ذکر کر رہا ہے، ڈوگن اس لبرل افسانے کو اس بغاوت کا مرکزی نقطہ قرار دیتے ہیں۔ وہ مکمل انفرادی خود مختاری کے تصور کو ایک 'نظریاتی دھوکہ' اور قطعی ناممکن کہہ کر مسترد کرتے ہیں۔ نفسیاتی طور پر بھی دیکھا جائے تو فرد کوئی خلا میں پیدا ہونے والی خود کفیل یا آزاد ہستی نہیں ہے، بلکہ یہ جدید نظام کی ایک مصنوعی پیداوار ہے۔ ہماری اقدار، ہماری خواہشات، ہمارے خوف اور ہمارا نقطہ نظر سب کچھ معاشرے نے نظریاتی اوزاروں کے ذریعے ہمارے اندر نصب کیا ہے۔ ڈوگن کا دوٹوک استدلال ہے کہ لبرل ازم نے کسی پہلے سے موجود آزاد فرد کو دریافت یا آزاد نہیں کرایا؛ بلکہ اس نے معاشرے کو ٹکڑوں میں بانٹنے اور انسانوں کو ان کی فطری، مقدس اور اجتماعی جڑوں سے کاٹنے کے لیے جان بوجھ کر 'فرد کی انفرادیت' کو تخلیق کیا ہے"۔۔۔


پروفیسر صدیقی نے تائید میں سر ہلایا اور کلاس کے درمیان ٹہلتے ہوئے اس فکری گرہ کو مزید کھولا، "بالکل درست، کاشف! ڈوگن کے مابعدالطبیعیاتی ڈھانچے میں—جو عیسائیت کے اُخروی تصورات سے گہرا اثر لیتا ہے—تمام جدید نظریات، چاہے وہ لبرل ازم ہو، کمیونزم ہو یا فاشزم، دراصل 'دجالی درندے کے سینگ' ہیں۔ کیونکہ یہ سب منظم طریقے سے خدا کو بے دخل کرتے ہیں اور خدائی الٰہامی نظام کی جگہ انسان کو مرکز تصورات کے نظام کو قائم کرتے ہیں"۔۔۔

پروفیسر صدیقی چاک بورڈ کے پاس رکے اور تاریخ کے اوراق پلٹتے ہوئے بولے، "اس بحران کی ابتدا کا کھوج لگانے کے لیے، ڈوگن تقریباً پانچ سو سال قبل مغربی یورپ میں رونما ہونے والے ایک گہرے تاریخی انقطاع کی طرف اشارہ کرتے ہیں۔ مرکزی دھارے کی تاریخ نویسی میں، نشاۃِ ثانیہ، اصلاحِ مذہب اور جغرافیائی دریافتوں کے دور کو روشن خیالی، سائنسی تحقیق اور انسانی آزادی کا سویرا قرار دے کر سراہا جاتا ہے۔ لیکن ڈوگن اس پورے بیانیے کو یکسر الٹ دیتے ہیں۔ ان کا ماننا ہے کہ یہ موڑ درحقیقت انسانی زندگی کے ہر شعبے—نہ صرف مذہب، بلکہ طبیعیات، کائنات شناسی، سیاست، ثقافت، اخلاقیات اور مابعدالطبیعیات—سے عیسائیت کے منظم خاتمے کا آغاز تھا۔ الٰہی ذات کی طرف مقدس اور عمودی رجحان کو ترک کر کے سیکولر مادیت پسندی اور 'ترقی کے جھوٹے نظریے' کو اپنانے سے، مغرب نے اس دور کا خاتمہ کر دیا جسے ڈوگن قرونِ وسطیٰ کی 'نارمل دنیا' کہتے ہیں، اور یوں پوری انسانیت 'قیامت کی تیاریوں' کے ایک طویل اور تاریک مرحلے میں داخل ہو گئی"۔۔۔


رافع نے حیرت سے اپنی بھنویں سکیڑیں، "سر، یہ تو بالکل الٹی گنگا بہانے والی بات ہے! مغرب نے تو پوری دنیا کو جدید بنایا اور اس پر حکمرانی کی، پھر خود مغرب اس بحران کا شکار کیسے ہوا؟"۔

"یہی ڈوگن کا سب سے حیرت انگیز اور گہرا نکتہ ہے، رافع!" پروفیسر صدیقی نے پرجوش لہجے میں وضاحت کی۔ "وہ مابعد نوآبادیاتی نظریے کو ایک انوکھے انداز میں الٹ دیتے ہیں۔ ڈوگن دلیل دیتے ہیں کہ سامراجیت کی سب سے طاقتور اور مہلک شکل 'ذہن کی غلامی' ہے، اور یہ کہ مغربی جدیدیت نے باقی دنیا کو غلام بنانے سے پہلے خود مغرب کو اپنا غلام بنایا۔ روشن خیالی نے یورپ کے تاریخی شعور کو غصب کیا، اس کے فکری ورثے کو مسخ کیا، اور اس کی اصل روایات کو چرا لیا۔ نتیجتاً، ڈوگن کا کہنا ہے کہ اگر مغرب اپنی اصل شناخت کو دوبارہ دریافت کرنا چاہتا ہے، تو اسے پہلے 'خود کو ذہنی غلامی سے آزاد کرانا' ہوگا۔ اور یہ ذہنی آزادی محض سطحی سازشی نظریات کے ذریعے نہیں، بلکہ فلسفہ، عمرانیات، بشریات، سیاسیات اور تاریخِ ادیان کو بروئے کار لاتے ہوئے سخت فکری تجزیے سے حاصل ہوگی۔

بالآخر، ڈوگن ایک دوٹوک علاج تجویز کرتے ہیں کہ مغربی تہذیب اپنی 'ترتیبات کو پیچھے موڑ کر' جدید دور سے پہلے کے زمانے میں جائے، اور خود کو روحانی فنا سے بچانے کے لیے ایک 'نئے قرونِ وسطیٰ' کو گلے لگائے"۔۔۔


زید، جو اب تک خاموشی سے نوٹس لے رہا تھا، آگے جھکا اور بولا، "سر، تو کیا ڈوگن اسی مقصد کے لیے اپنا 'چوتھا سیاسی نظریہ' پیش کرتے ہیں؟"۔۔

"ہاں زید،" پروفیسر صدیقی نے وضاحت کی۔ "بیسویں صدی میں تین نظریات لڑے: لبرل ازم جس کا مرکز 'فرد' تھا، کمیونزم جس کا مرکز 'طبقہ' تھا، اور فاشزم جس کا مرکز 'نسل' تھی۔ کمیونزم—جس کا انجام ہم نے سوویت یونین کے انہدام کی صورت میں دیکھا—اور فاشزم اس لیے ہار گئے کیونکہ وہ بھی مادیت پرستی کے دائرے میں قید تھے۔ ڈوگن کا چوتھا سیاسی نظریہ ان تینوں کو مسترد کر کے ہائیڈیگر کے تصورِ 'ڈیزائن' یعنی روایت اور روحانیت سے جڑے ہوئے زندہ انسانی وجود کو تاریخ کا مرکز بناتا ہے۔ اور اس جنگ میں وہ اپنے ملک روس کو بائبل کے 'کیٹیکون' یعنی برائی کو روکنے والی قوت قرار دیتے ہیں۔ ان کے نزدیک روس کوئی عام ملک نہیں بلکہ یوریشیائی یعنی یورپ اور ایشیاء دونوں کی تہذیب کا مرکز ہے"۔۔۔


یہ سنتے ہی رافع نے فوراً ایک اہم سوال داغا، "سر، یہ سوال تو بنتا ہے کہ اگر ڈوگن کی اس تجویز کو مکمل طور پر عملی جامہ پہنایا جائے، تو خود روس پر اس کے کیا تہذیبی اثرات مرتب ہوں گے؟"۔۔

پروفیسر صدیقی مسکرائے، "بہت اہم سوال ہے رافع! روس کے لیے اس کا مطلب ایک جدید، سیکولر ریاست سے ایک نظریاتی اور روحانی سلطنت میں مکمل تبدیلی ہے۔ داخلی طور پر، اس کا مطلب یہ ہوگا کہ انفرادی حقوق اور منڈی کی معیشت کو اجتماعی روحانی مقاصد، آبادیاتی احیا، آرتھوڈوکس روایت پسندی، اور مراتب پر مبنی اتھارٹی کے تابع کر دیا جائے گا۔ روس اپنی کامیابی کو مادی دولت یا ٹیکنالوجی پر مبنی صارفیت کے مغربی معیارات سے ماپنا چھوڑ دے گا، اور اس کے بجائے روحانی روایت اور جغرافیائی و سیاسی خود مختاری کے ساتھ اپنی وفاداری کی بنیاد پر خود کو پرکھے گا"۔۔


کاشف نے بات کو آگے بڑھاتے ہوئے دوسرا سوال اٹھایا، "اور سر، باقی دنیا پر اس کے کیا اثرات پڑیں گے؟ کیا اس سے عالمی نظام کی ساخت بدل جائے گی؟"۔

"یقیناً کاشف!" پروفیسر صدیقی نے جواب دیا۔ "باقی دنیا کے لیے ڈوگن کا وژن یک قطبی، مغرب کی قیادت والے عالمی نظام کو توڑنے اور اس کی جگہ مختلف تہذیبوں پر مشتمل ایک کثیر قطبی دنیا قائم کرنے کا خواہاں ہے۔ اس کثیر قطبی ڈھانچے میں، مغربی اقدار—جیسے کہ لبرل جمہوریت، سیکولرازم، اور عالمگیر انسانی حقوق—سے ان کی آفاقیت کا دعویٰ چھین لیا جائے گا اور انہیں محض ایک زوال پذیر تہذیب کے مقامی اور بوسیدہ رسم و رواج کے طور پر بے نقاب کیا جائے گا۔"۔۔


زید نے تجسس سے تیسرا سوال پوچھا، "سر، تو کیا اس کا مطلب یہ ہے کہ دیگر غیر مغربی تہذیبوں کو بھی اپنے پرانے نظاموں کی طرف لوٹنے کا موقع ملے گا؟"۔۔

"بالکل زید!" پروفیسر نے سر ہلایا۔ "ڈوگن کے اس وژن کے تحت دیگر بڑے تہذیبی بلاکس—جیسے کہ عالمِ اسلام، چین، بھارت، اور لاطینی امریکا—کو اس بات کی ترغیب دی جائے گی کہ وہ مغربی جدیدیت سے اپنی 'ذہنی آزادی' حاصل کریں، اور اپنی مقامی روایات، مذاہب اور سماجی نظاموں کو دوبارہ اپنائیں"۔۔


ہال میں گہرا سکوت چھا گیا۔ سردی کی دھوپ کھڑکی کے شیشوں سے چھن کر ماربل کے فرش پر لکیریں بنا رہی تھی۔ زید نے گہری سانس لی اور گویا ہوا، "سر، سوویت یونین کے زوال اور ڈوگن کی یہ تمام باتیں سن کر مجھے احساس ہوتا ہے کہ اس میں ہم مسلمانوں کے لیے کتنا بڑا سبق پوشیدہ ہے۔ جس طرح گورباچوف نے اپنے نظام کو بچانے کے لیے مغربی اصلاحات کا سہارا لیا اور پوری ریاست زمین بوس ہو گئی، ہمارے ہاں بھی آج ایسے طبقات موجود ہیں جو سمجھتے ہیں کہ ہم مغربی جدیدیت کی نقالی کر کے اپنی تقدیر بدل لیں گے۔ حالانکہ یہ تو اس زہر سے شفا مانگنے کے مترادف ہے جس نے ہمیں بیمار کیا ہے"۔۔۔


پروفیسر صدیقی کی آنکھوں میں چمک ابھری، "تم کس طرف اشارہ کر رہے ہو زید؟"۔۔

زید نے پراعتماد لہجے میں کہا، "سر، میں اکیسویں صدی کے عظیم مصری مفکر عبدالوہاب المسیری اور ہمارے اپنے علامہ محمد اقبال کی طرف اشارہ کر رہا ہوں۔ المسیری نے اپنی زندگی کے بیس سال صیہونیت اور جدیدیت کے مطالعے میں وقف کر کے یہ ثابت کیا کہ سرمایہ داری، عالمگیریت، سامراجیت اور صیہونیت سب ایک ہی مادیت پسندانہ سوچ کے مختلف روپ ہیں، جو کائنات اور انسان کو محض قابلِ استعمال مادہ سمجھتے ہیں۔ المسیری نے مغربی لبرل ازم کے 'بکھرے ہوئے فرد' کے مقابلے میں انسان کی اصل حقیقت بیان کی کہ انسان وہ مکرم مخلوق ہے جس میں خدا نے اپنی روح پھونکی اور اسے مذہب، فن اور اخلاقیات کی طرف فطری میلان عطا کیا"۔۔۔

کاشف نے فوراً بات کو آگے بڑھایا، "اور نفسیاتی طور پر بھی دیکھا جائے تو جب انسان سے اس کی روحانی شناخت چھین لی جاتی ہے تو وہ اندر سے کھوکھلا ہو جاتا ہے۔ جدید انسان کی بے چینی اور تنہائی کی سب سے بڑی وجہ یہی روحانی خلا ہے"۔۔


"بالکل!" زید نے پرجوش انداز میں کہا، "اور اسی روحانی خلا کو پر کرنے اور مسلمانوں کو ذہنی غلامی سے نکالنے کے لیے علامہ اقبال نے فلسفۂ خودی پیش کیا۔ اقبال نے دہائیوں پہلے بھانپ لیا تھا کہ مغرب کی ظاہری چمک دمک کے پیچھے اخلاقی اندھیرا ہے۔ مغرب کا 'فرد' صارفیت اور خواہشات کا غلام ہے، جبکہ اقبال کی 'خودی' عشقِ الٰہی، ضبطِ نفس اور مسلسل عمل سے تعمیر ہوتی ہے۔ جب فرد کی خودی بیدار ہوتی ہے تو وہ حالات کا محکوم نہیں رہتا بلکہ زمین پر اللہ کا نائب بن کر اپنی تقدیر خود لکھتا ہے، اور جب افراد کی خودی بیدار ہوتی ہے تو پوری قوم کی خودی زندہ ہو جاتی ہے"۔۔۔


اس گفتگو کے دوران پروفیسر صدیقی کی نظر ہال کی پچھلی نشستوں پر خاموش بیٹھے باقی طلبہ پر پڑی، جو محض تماشائی بنے نوٹس اتار رہے تھے۔ پروفیسر نے ہاتھ کے اشارے سے پوری کلاس کو مخاطب کیا اور قدرے سنجیدہ مگر مشفقانہ لہجے میں گویا ہوئے، "آپ لوگ بھی کلاس کی اس بحث میں حصہ لیا کریں۔۔۔ یہ کیا کہ گدھے کی طرح محض کتابوں اور کاغذوں کا بوجھ اٹھائے رہیں اور کچھ سیکھ نہ پائیں! یاد رکھیں کہ سطحی معلومات سے کبھی شعور بیدار نہیں ہوتا۔ گہرا علم حاصل کرنے کے لیے کتابیں پڑھنی ہوں گی، اور ایک ذمہ دار فرد بننے کے لیے علم کی تحصیل کی خاطر پوری لگن اور توجہ سے کتاب پڑھیں اور اپنی فکری استعداد کو بڑھائیں"۔۔


کلاس میں ایک لمحے کے لیے سنجیدگی چھا گئی اور کئی طلبہ سیدھے ہو کر بیٹھ گئے۔ اتنے میں رافع نے اپنا آئی پیڈ بند کر کے میز پر رکھ دیا اور مسکرا کر بولا، "اس کا مطلب ہے سر، اصل جدت اور مستقبل ماضی کی اندھی تقلید یا مغرب کی غلامی میں نہیں، بلکہ گہرے مطالعے اور اپنی روحانی جڑوں سے جڑ کر خود کو دریافت کرنے میں ہے"۔۔۔

پروفیسر صدیقی نے گھڑی دیکھی، پیریڈ ختم ہونے کی گھنٹی بج چکی تھی۔ انہوں نے اپنی کتابیں سمیٹتے ہوئے ایک گہری مسکراہٹ کے ساتھ پوری کلاس پر نظر ڈالی اور فرمایا، "بے شک! جنت اور جہنم کے اس فکری معرکے میں اصل فتح اسی قوم کی ہوگی جو اپنے ذہن کو غلامی سے آزاد کرا کر فرد اور قوم کی 'خودی' کو پہچان لے گی۔ آج کی کلاس کا اختتام میں شاعرِ مشرق علامہ اقبال کے ان لازوال اشعار پر کروں گا جو ہمارے آج کے موضوع کا نچوڑ ہیں:۔۔


افراد کے ہاتھوں میں ہے اقوام کی تقدیر

ہر فرد ہے ملت کے مقدر کا ستارہ

اور جب فرد اور قوم اپنی خودی کے اس راز کو پا لیتے ہیں، تو اقبال فرماتے ہیں:۔۔

خودی کا سرِ نہاں لا الہ الا اللہ

خودی ہے تیغِ فساں لا الہ الا اللہ

اپنی ملت پر قیاس اقوامِ مغرب سے نہ کر

خاص ہے ترکیب میں قومِ رسولِ ہاشمیؐ

آج کی کلاس یہیں ختم ہوتی ہے"۔۔

تینوں شاگرد ہال سے باہر نکلے تو گورڈن کالج کے پرانے برآمدوں میں سرد ہوا چل رہی تھی، لیکن ان کے ذہنوں میں تاریخ، تہذیب اور خودی کے نئے چراغ روشن ہو چکے تھے۔


0
58

Rooftop Solar Power System Installation Guide for Modern Buildings

A Rooftop Solar Power System is an effective solution for generating clean and renewable e...

Harwing Powertech
3 minutes ago

buy commercial freezer

buy commercial freezer, buy commercial freezer

ozcoolers
3 minutes ago
Invention Patent Attorney: Patent Risk Before Your Launch

Invention Patent Attorney: Patent Risk Before Your Launch

EVLG
6 minutes ago

Single Girder vs Double Girder EOT Crane: Cost and Performance

Compare single girder vs double girder EOT cranes based on cost, lifting capacity, perform...

Bright Crane Equipment
18 minutes ago
Backyard Citrus Trees & Cool-Season Fruit Guide, East Bay

Backyard Citrus Trees & Cool-Season Fruit Guide, East Bay

Evergreen nursery
23 minutes ago
BangBox Online homepage