کہانی: آؤ؛ اپنے ساتھی کی جان بچائیں
This story in Urdu "کہانی: آؤ؛ اپنے ساتھی کی جان بچائیں" is about Philippe Descola (born 1949) who is a renowned French anthropologist and emeritus professor at the Collège de France, trained under the legendary structuralist Claude Lévi-Strauss. A leading voice in anthropology’s "Ontological Turn," he gained international acclaim for his fieldwork among the Achuar people of the Ecuadorian Amazon in the late 1970s. His work fundamentally challenges the modern Western divide between human "culture" and physical "nature," redefining how we understand humanity's place on Earth. This story "کہانی: آؤ؛ اپنے ساتھی کی جان بچائیں" carries message for Nation Pakistan.
أَعُوذُ بِاللّٰهِ مِنَ الشَّيْطَانِ الرَّجِيمِ
بِسۡمِ ٱللهِ ٱلرَّحۡمَـٰنِ ٱلرَّحِيمِ
اللہ کے نام سے شروع جو بڑا مہربان نہایت رحم کرنے والا ہے
کہانی: آؤ؛ اپنے ساتھی کی جان بچائیں
یہ بات ہے زہراء کی سالگرہ کی رات کی۔ گھر میں خوب رونق لگی ہوئی تھی، سارے خاندان والے اکٹھے ہوئے تھے۔ جب تالیوں کی گونج میں کیک کاٹا گیا، تو 70 سالہ رعنا بیگم کی لاڈلی نواسی زہراء نے معصومیت سے پوچھا، "نانو! آپ نے اپنی پہلی سالگرہ کب اور کہاں منائی تھی؟"۔۔
رعنا بیگم نے مسکراتے ہوئے زہراء کے سر پر ہاتھ پھیرا اور کہا، "بیٹا، آج رات یہیں رکو، تو سب کو ایک ساتھ بتاؤں گی۔"۔
بس، جیسے ہی دعوت اختتام کو پہنچی، گھر کے سارے 'جن زی' اور 'جن الفا' پوتے پوتیوں اور نواسے نواسیوں نے رعنا بیگم کو ان کے کمرے میں گھیر لیا۔ کوئی بیڈ پر چڑھ بیٹھا تو کوئی قالین پر آلتی پالتی مار کر بیٹھ گیا، اور سب لگے سوال کرنے۔
رعنا بیگم نے ایک پرانا، مخملی البم نکالا اور بولیں، "بیٹا جی، میں کشمیر کی ایک بہت ہی خوبصورت وادی میں پیدا ہوئی تھی۔ میرے بچپن کے پہلے پانچ سال وہیں گزرے، اور بعد میں بھی میں وہاں جاتی رہی۔ تو میری پہلی سالگرہ بھی وہیں منائی گئی تھی۔ چلو، میں تمہیں اس کی تصویر دکھاتی ہوں۔"۔۔
انہوں نے البم کا ایک صفحہ کھولا۔ وہ ایک سیاہ و سفید مگر بے حد صاف تصویر تھی۔ ننھی سی رعنا ایک پھولوں بھرے میدان میں بیٹھی مسکرا رہی تھی، اور پسِ منظر میں دیودار اور چنار کے بلند و بالا درخت اپنی پوری شان سے کھڑے تھے، جن کے پیچھے برف پوش پہاڑ اور ایک شفاف ندی بہہ رہی تھی۔
سب بچے ایک ساتھ بول اٹھے، "واہ نانو! آپ کتنی خوبصورت تھیں!"۔۔
رعنا بیگم ہنس پڑیں، "آپ سب بھی بہت پیارے ہو، میرے بچو! لیکن ذرا غور سے دیکھو کہ میرے پیچھے یہ جگہ کتنی پیاری تھی۔ ہمارے بزرگ کہتے تھے کہ یہ ندیاں، یہ آبشاریں، یہ چشمے، وہ درخت، وہ پرندے، آسمان کے بادل اور ہوا—یہ سب ہم سے باتیں کرتے ہیں۔ بچپن میں مجھے ان کی یہ باتیں عجیب لگتی تھیں، مگر جب میں بڑی ہوئی تو ان کی کہی ہوئی ہر بات سچی ثابت ہوئی۔ اس البم میں آپ کو اس جگہ کی شاندار یادیں ملیں گی۔ میں تو یہاں بار بار گئی۔ شادی کے بعد آپ کے دادا کے ساتھ بھی یہیں گئی تھی، اور ان کے ساتھ مل کر میں نے اور وہاں کی ہواؤں نے، پرندوں نے، درختوں نے اور بہتے ہوئے پانی نے خوب باتیں کی تھیں"۔۔
اس پر پوتی ایمان نے کھلکھلا کر کہا، "واہ دادی! ہاؤ رومینٹک !"۔
رعنا بیگم پیار سے مسکرائیں، "بیٹا، اگلی دفعہ چلیں گے تو تمہیں دکھاؤں گی اور سناؤں گی ان کے گیت!"۔
یونیورسٹی میں پڑھنے والے پوتے حمزہ نے تصویر کو غور سے دیکھا اور ایک گہری آہ بھری، "دادو، پچھلے سال جب ہم وہاں گئے تھے، تو آدھے سے زیادہ درخت کٹ چکے تھے اور ندی میں بھی پلاسٹک اور گندگی تھی۔ آخر انسانوں نے اس جنت کا یہ حال کیوں کر دیا؟"۔۔
رعنا بیگم کے چہرے پر ایک لمحے کے لیے اداسی چھا گئی۔ انہوں نے عینک درست کی اور بولیں، "حمزہ بیٹا، تمہارا یہ سوال آج پوری دنیا کا سب سے بڑا سوال ہے۔ چلو، آج میں تمہیں اس کی داستان سناتی ہوں کہ انسان سے کہاں غلطی ہوئی، اور کیوں ہم فطرت کے گیت سننا بھول گئے"۔۔۔
سب بچے ہمہ تن گوش ہو گئے۔
فطرت اور انسان کی جھوٹی تقسیم
رعنا بیگم نے بات آگے بڑھائی: "بچو! صدیوں پہلے جدید مغربی سوچ نے ایک عجیب سا بٹوارہ کر دیا۔ انہوں نے دنیا کو دو حصوں میں بانٹ دیا: ایک طرف 'ثقافت' (کلچر) یعنی انسان، اس کی عقل، زبان اور سیاست؛ اور دوسری طرف 'فطرت' (نیچر) یعنی درخت، دریا، پہاڑ اور جانور، جنہیں محض بے جان مادہ یا استعمال کی چیز سمجھ لیا گیا۔ انسان نے خود کو زمین کا 'آقا اور مالک' سمجھ لیا۔
لیکن ہم اپنی زمین کے ساتھ ایسا نہیں کرتے تھے۔ ہمیں اپنی زمین، آسمان، درختوں، پرندوں، پھلوں، پھولوں، تتلیوں اور بہتے چشموں سے پیار تھا—اور اب بھی ہے۔ مگر ہم کوئی انوکھے لوگ نہیں تھے! پچھلے سال میں نے ایک کتاب پڑھی (فطرت اور ثقافت سے ماورا) جس کے لکھاری ایک فرانسیسی مفکر اور ماہرِ بشریات فلپ ڈیسکولا تھے۔ انہوں نے 1970 کی دہائی میں جنوبی امریکہ کے ایمیزون جنگلات میں "آچوار" نامی ایک قدیم قبیلے کے ساتھ کئی سال گزارے۔ وہاں جا کر ڈیسکولا حیران رہ گئے! ان لوگوں کی زبان میں 'فطرت' نام کا کوئی لفظ ہی نہیں تھا۔ وہ جنگل کے درختوں، دریاؤں اور پرندوں کو کوئی بے جان چیز نہیں بلکہ اپنا رشتہ دار اور جیتا جاگتا انسان سمجھتے تھے۔ وہاں کی عورتیں اپنے پودوں کے لیے لوریاں گاتی تھیں جیسے بچوں کو پالا جاتا ہے، اور شکاری شکار سے پہلے جنگل کی روحوں سے معافی مانگتے اور اجازت لیتے تھے—بالکل ویسے ہی جیسے ہمارے بزرگ ندیوں اور ہواؤں سے باتیں کرتے تھے"۔۔۔
چھوٹی زہراء نے حیرت سے آنکھیں پھیلائیں، "نانو، تو کیا سچ مچ دنیا کو دیکھنے کے الگ الگ طریقے ہوتے ہیں؟"۔
"ہاں بیٹا،" نانو مسکرائیں، "ڈیسکولا نے دنیا بھر کی تہذیبوں کا مطالعہ کر کے بتایا کہ انسان اور کائنات کے رشتے کو دیکھنے کے چار طریقے (آنٹولجیز) ہیں، جنہیں انہوں نے انسان کے اندرونی شعور (داخلیت) اور بیرونی جسم (مادیت) کی بنیاد پر سمجھایا:۔۔
1. نیچر ازم: یہ جدید دور کا طریقہ ہے۔ اس میں ہم مانتے ہیں کہ ہمارا اور جانوروں کا جسم ایک جیسے عناصر سے بنا ہے، مگر عقل اور روح صرف انسان کے پاس ہے۔ اسی غرور نے ہمیں درختوں کو محض لکڑی اور دریاؤں کو محض پانی کی نالی سمجھنا سکھایا، جس کا نتیجہ آج موسمیاتی تبدیلی اور تباہی کی صورت میں نکل رہا ہے۔
2. اینی مزم : یہ ان مقامی قبائل کا طریقہ ہے جو مانتے ہیں کہ جانوروں، درختوں اور دریاؤں کی شکل ہم سے الگ ہے، مگر ان کے اندر بھی ہماری طرح روح، احساسات اور سماج موجود ہے۔
3. ٹوٹم ازم: جیسے آسٹریلیا کے قدیم باشندے مانتے ہیں کہ ایک مخصوص قبیلہ، کوئی خاص جانور یا درخت ایک ہی آباؤ اجداد کی اولاد ہیں—یعنی ان کی روح بھی ایک ہے اور جسم کا رشتہ بھی ایک۔
4. اینالاگ ازم: اور یہ چوتھا طریقہ ہمارا اپنا مشرقی اور جنوبی ایشیائی طریقہ ہے! اس میں کائنات کی ہر شے الگ ہوتے ہوئے بھی ایک دوسرے سے جڑی ہوئی ہے—جیسے ستاروں کا اثر موسموں پر، موسموں کا فصلوں پر، اور انسان کے اعمال کا زمین کے توازن پر ہوتا ہے۔"۔۔۔
اور اس کی گواہی اللہ تعالی نے قرآن مجید کی سورۃ الروم (آیت نمبر 41) میں یوں دی ہے کہ
"خشکی اور تری میں لوگوں کے اپنے ہاتھوں کی کمائی (برے اعمال) کی وجہ سے فساد پھیل گیا ہے، تاکہ اللہ انہیں ان کے بعض اعمال کا مزا چکھائے، شاید کہ وہ (برائی سے) باز آ جائیں"۔۔۔
آج ہم اسے 'پولوشن' یا آلودگی کہتے ہیں اسکا سبب ہم خود ہی تو ہیں۔ ہمارے علامہ اقبال نے کیا خواب نظم "ترانہ ہندی" کہی ہے؛ جو بانگِ درا میں موجود ہے
سارے جہاں سے اچھا ہندوستاں ہمارا؛ ہم بلبلیں ہیں اس کی، یہ گلستاں ہمارا
پربت وہ سب سے اونچا ہم سایہ آسماں کا؛ وہ سنتری ہمارا وہ پاسباں ہمارا
گودی میں کھیلتی ہیں اس کی ہزاروں ندیاں؛ گلشن ہے جن کے دم سے رشک جناں ہمارا
اور پھر ہمارے ایک اور شاعر احمد فراز ہیں انہوں نے فطرت سے متعلق ہماری بگڑتی عادتوں کو موضوع بنا کر کیا خوب کہہ رکھا ہے کہ
شاخ سے ٹوٹے ہوئے پھول نے حسرت سے کہا؛ مجھ کو گلشن سے جدا کرنے والے تیری خیر
ہمارے خطے کی بھولی ہوئی حکمت
رعنا بیگم نے البم پر ہاتھ پھیرتے ہوئے کہا، "بچو، ڈیسکولا نے مجھے اپنی نانو کی باتیں یاد کرا دیں۔ انہوں نے کہا تھا کہ جب انگریز برصغیر میں آئے، تو انہوں نے ہمارے صدیوں پرانے رشتے کو توڑ دیا۔ پہلے ہمارے لوگ جنگل کو اپنا محافظ اور دریا کو زندگی کی علامت سمجھتے تھے۔ انگریزوں نے جنگلوں کو 'محکمہ جنگلات' بنا کر درختوں کو محض 'مکعب فٹ لکڑی' میں ناپنا شروع کر دیا۔
ذرا اپنی صوفی شاعری کو یاد کرو! شاہ عبداللطیف بھٹائی ہوں، بلھے شاہ ہوں یا خواجہ غلام فرید—ان کے کلام میں دریائے سندھ، روہی کا صحرا اور پرندے انسان کے ہم راز اور زندہ کردار ہیں۔ اور 1970 کی دہائی میں کوہِ ہمالیہ کی خواتین نے جب لکڑہاروں سے بچانے کے لیے درختوں کو گلے لگا لیا تھا (چپکو تحریک)، تو وہ دراصل اپنے خاندان کے بزرگوں کو بچا رہی تھیں! اور سب سے بڑھ کر، ہمارے دین نے ہمیں زمین کا 'مالک' نہیں بلکہ 'خلیفہ' اور 'امین' بنایا ہے، اور کائنات کے توازن یعنی 'میزان' کو بگاڑنے سے منع کیا ہے"۔۔۔
بچوں کا عزم اور عملی منصوبہ
کالج میں پڑھنے والی نواسی سارہ نے پوچھا، "تو نانو، اب ہم جن زی اور جن الفا کیا کر سکتے ہیں؟ تاکہ ایمان جب اگلی بار کشمیر جائے تو اسے وہی پرانے گیت سننے کو ملیں؟"۔۔
رعنا بیگم نے پیار سے سب کو دیکھا اور بولیں، "ڈیسکولا کہتے ہیں کہ ہمیں پیچھے نہیں جانا، بلکہ آگے بڑھ کر خود کو کائنات کا 'مالک' سمجھنے کے بجائے 'دنیا کا مرتب کنندہ' اور 'نگہبان' بننا ہے۔ دیکھو، آج دنیا بدل رہی ہے۔ بنگلہ دیش کی عدالت نے اپنے تمام دریاؤں کو 'زندہ انسان' جیسے قانونی حقوق دیے ہیں، اور اب پاکستان میں بھی دریائے سندھ کو قانونی حقوق دینے کی بات ہو رہی ہے تاکہ کوئی اس میں زہر نہ گھول سکے۔
اور بچو! زمین کو اتنا حسین اور جاندار بنانے کے لیے کہ فطرت کا ہر رنگ ہم سے ہمکلام ہوتا محسوس ہو، فطرت سے محبت اور اس کی بحالی کا عزم سب سے پہلا قدم ہے۔ جب ہم زمین کو عزت اور سکون دیتے ہیں، تو درخت، پھول اور پرندے خود بخود لوٹ آتے ہیں اور فضا میں زندگی کا سنگیت گونجنے لگتا ہے۔ چلو اب آپ سب مل کر بتاؤ کہ اس خواب کو حقیقت بنانے کے چند خوبصورت طریقے کیا ہو سکتے ہیں؟"۔۔
نانو کا سوال سنتے ہی کمرے میں جوش و خروش کی لہر دوڑ گئی، اور سب بچے ایک کے بعد ایک اپنی تجاویز پیش کرنے لگے:۔۔
1. فطرت کو واپس بلانا (ہریاولی اور خوشبو)
سب سے پہلے سارہ بولی، "نانو! ہم فطرت کو واپس بلائیں گے۔ ہم ایسے مقامی درخت اور پھول لگائیں گے جو ہماری مٹی اور آب و ہوا کا حصہ ہیں—جیسے املی، نیم، املتاس، موتیا اور گلاب، تاکہ خوشبودار پھول فضا کو معطر کر کے فطرت کی زبان بن جائیں"۔۔
حمزہ نے بات آگے بڑھائی، "بالکل! اور ہم گلیوں کے کناروں، خالی پلاٹوں اور گھروں کی چھتوں پر چھوٹے جنگلات اور سبز گوشے تیار کریں گے تاکہ کنکریٹ کے اس جنگل میں زمین کو سانس لینے کی جگہ مل سکے"۔۔۔
2. پرندوں اور تتلیوں کو مہمان بنانا
ننھی زہراء فوراً بولی، "اور میں پرندوں اور تتلیوں کو اپنا مہمان بناؤں گی! ہم درختوں پر لکڑی کے چھوٹے گھونسلے لٹکائیں گے اور صحن و چھت پر مٹی کے برتنوں میں روز تازہ پانی اور دانہ رکھیں گے، تاکہ صبح و شام پرندوں کی چہچہاہٹ سے فطرت کی گفتگو سنائی دے"۔۔۔
ایمان نے مسکراتے ہوئے اضافہ کیا، "اور ہم رنگ برنگے رس دار پھول بھی لگائیں گے جو تتلیوں اور شہد کی مکھیوں کو اپنی طرف کھینچیں، جن سے باغیچے میں زندگی کی لہر دوڑ جائے گی!"۔۔
3. آسمان اور ہوا کو صاف رکھنا
آٹھویں جماعت میں پڑھنے والے پوتے زین نے سنجیدگی سے کہا، "دادو، اگر ہمیں ستاروں بھرا آسمان اور تازہ ہوا واپس چاہیے تو ہمیں آلودگی اور شور کو کم کرنا ہوگا۔ ہم پلاسٹک کا استعمال چھوڑ دیں گے، کوڑا نہیں جلائیں گے، اور غیر ضروری ہارن و شور سے گریز کریں گے تاکہ ماحول میں وہ سکون پیدا ہو جس میں ہوا کی سرسراہٹ اور پتوں کی آواز سنائی دے سکے"۔۔۔
4. زمین کا بوجھ ہلکا کرنا
حمزہ نے سب کی بات سمیٹتے ہوئے کہا، "اور سب سے اہم یہ کہ ہم زمین کا بوجھ ہلکا کریں گے۔ ہم پودوں کے لیے کیمیائی کھادوں کے بجائے گھر کے کچرے سے بنی قدرتی کھاد استعمال کریں گے تاکہ مٹی میں بسنے والے ننھے جاندار محفوظ رہیں، اور ندی نالوں، پارکوں اور راستوں کی صفائی کو عبادت سمجھ کر اپنائیں گے"۔۔۔
بچوں کی باتیں سن کر رعنا بیگم کی آنکھیں خوشی سے چمک اٹھیں۔ انہوں نے سب کو گلے لگاتے ہوئے کہا، "شاباش میرے بچو! یاد رکھو، جب انسان فطرت کا دوست بن جاتا ہے، تو ہوا کے جھونکے، کھلتے ہوئے پھول اور اڑتے ہوئے پرندے واقعی دل سے باتیں کرتے محسوس ہوتے ہیں۔ کل صبح سے ہم سب مل کر اپنے گھر کے لان سے اس نئے سفر کا آغاز کریں گے!"۔۔۔
اس رات بچے سونے کے لیے لیٹے تو ان کی آنکھوں میں کنکریٹ کے شہروں کے بجائے ایک سرسبز، چہچہاتی اور ہمکلام ہوتی ہوئی زمین کے خواب سجے تھے۔ زمین کے واہموں کے معمار رخصت ہو رہے تھے، اور اس کے حقیقی نگہبان جاگ اٹھے تھے۔
آؤ؛ اپنے ساتھی کی جان بچائیں
کبھی یہ ندیاں، یہ پیڑ پودے، ہوا کے جھونکے، یہ نیلا امبر؛
ہمارے ساتھی، ہمارے ہم دم، ہمارے جیون کے رازداں تھے۔
مگر یہ کیسا غرور جاگا، کہ ہم نے خود کو خدا سمجھ کر؛
جو اپنے ساتھی تھے ان کو محکوم اور بے زباں جان کر مٹا ڈالا!۔
یہ ہم نے دیوار کھینچ ڈالی ہے اپنے اور اپنی اس زمیں کے درمیاں؛
مگر حقیقت یہی ہے لوگو، یہ پیڑ، دریا، چرند سارے؛
ہمارے جیسی ہی روح رکھتے ہیں، درد سہتے ہیں، مسکراتے ہیں، گنگناتے ہیں؛
اگر یہ روٹھے تو ہم بھی اجڑیں، اگر یہ بکھرے تو ہم بھی ٹوٹیں!۔
نہ ہم ہیں مالک اس کائنات کے، نہ ہم ہیں آقا اس گلستاں کے؛
ہمیں تو خالق نے اس زمیں پر فقط امین اور نگہباں بھیجا!۔
چلو کہ واہموں کے اس محل کو گرا کے پھر سے نیا جہاں ہم بسائیں مل کر؛
وہی پرانا سا پیار لوٹائیں، درختوں، دریاؤں سے پھر سے ناطہ جوڑیں!۔
لگائیں پودے، سجائیں گلشن، پرندوں کے واسطے گھونسلے بنائیں؛
ہوا کو نکھاریں، زمیں سنواریں، ہر ایک ندی کو زندگی کا پیام دیں ہم!۔
اٹھو کہ نانو کی یادگاروں، کشمیر کی وادیوں کا قرض اتارنا ہے؛
ہمارا ساتھی پکارتا ہے—آؤ، اپنے ساتھی کی جان بچائیں!۔